Հունիսի 3. կրթահամալիրի տնօրենի հետ հանդիպում: Խումբը հայրենագետների, բնագետների, մաթեմատիկների մի փունջ էր, ովքեր կարծում եմ կարևոր օղակ են աճող սերնդի կրթման ու զարգացման գործում: Կարծում եմ կարևոր են այսպիսի ձևաչափով քննարկումները հենց այսպիսի մակարդակով: Այսպիսի հանդիպումների միջոցով վերլուծում ու հասկանում ես, թե ինչ ես տվել մի ամբողջ ուսումնական տարվա ընթացքում: Հետհայացք ես ուղղում դեպի կատարած և կիսատ թողած աշխատանքներիդ վրա, հասկանում բացթողումներդ ու շարժվում առաջ, իրավունք չունենալով նույն վրիպումները կրկնելու երկրորդ անգամ: Հանդիպումն այսօրվա բավականին ջերմ մթնոլորտում անցավ: Եվս մեկ անգամ համոզվում ես, թե ինչ կարևոր դեր ունի ընդհանրապես տնօրենը իր աշխատողների գործունեության կայացման ընթացքին: Այսօրվա քննարկմանը իմ կարծիքով պիտի մասնակից դարձնել նաև այլ դպրոցների տնօրենների, որովհետև նրանք շատ բան կամբարեն ու կսովորեն: Կցանկանայի անդրադառնալ մեր հեղինակային կրթության հիմնական բաղադրիչ հանդիսացող նախագծային աշխատանքների պատշաճ կատարմանը: Իրոք նախորդ ժողովին տիար Գևորգը ճիշտ դիտողություն արեց: Պետք է շատ լրջորեն վերաբերվել նախագիծ ասվածին: Երբ ծանոթանում ես այսպես անվանարկված ու լուսաբանվող ինչ-որ նախագծի, մտածում ես լուրջ արդյունքների պիտի հանդիպես, բայց արի ու տես, որ մի առօրեական թեթև աշխատանք է, որը իրոք հեռու է վերոնշյալ կոչմանն արժանանալուց: Հանդիպման ընթացքում ցանկանում էի 2 այպես ասած թեմայի մասին խոսել: Բայց հաշվի առնելով բուռն քննարկումը և ժամանակի սղությունը, չստացվեց:
- Ինչու եմ հայտիս մեջ նշել 4-5-րդ դասարանների, 6-8-րդ դասարանների մաթեմատիկայի դասավանդում: Մեծ հաշվով ինձ համար շատ կարևոր է իմ ներկայիս սովորողներին մինչև դպրոցի ավարտը դասավանդելը: Քանի որ չեմ կարողանում ոչ մի դասարանին հաջողություն մաղթել, ստիպված հայտիս մեջ Ավագ դպրոց և այլն, չնշվեցին:
- Ցանկանում էի <<մաթեմատիկա առանց բանաձևերի >> դասընթացի մասին էլ խոսել: Պետք է վերջինիս արդյունավետությանը հստակ ուշադրություն դարձնենք, որովհետև ինչպես ես եմ նկատել, այն շահավետ չէ մեր սովորողների համար, ու անլուրջ վերաբերմունք կա սովորողների շրջանում առ այն: Ըստ իմ սուբյեկտիվ կարծիքի՝ 7-8-րդ դասարաններում լավ կլիներ, որ դրան հատկացվող 1 դասաժամը հատկացվեր Հանրահաշվին:
Ամփոփելով այսօրը, ասեմ, որ սա օգտակար եղավ ինձ համար, քանի որ իրադարձություններ էին կատարվում կրթահամալիրում, որին ես տեղյակ չէի ու իմացա:Բացի այդ հաճելի էր լսել , մեր շատ սիրելի ու <<մեծ ընտանիքի >>անդամների ձայները՝թեկուզ առցանց տարբերակով:
Արշակ Մարտիրոսյան 