This slideshow requires JavaScript.
Ահա վերջապես սպասված դեկտեմբերի 1-ը: Այն իմաստով, որ ճանապարհ ենք բռնել դեպի գյուղ Արատես: 10 հոգանոց խումբ, որի ղեկավարությունն իր վրա էր վերցրել Սմբատ Պետրոսյանը: Անկեղծ լինելով, չեմ կարող չնշել, որ տպավորված եմ բառիս բուն իմաստով: Նախ մտնելով գյուղ , փորձում ես մտովի զուգահեռներ տանել՝ պատկերացնելով նախկին Արատեսի և ներկայիս վերակառուցվող և իր ուրույն նկարագիրը ստացող Արատեսի միջև: Եվ վերակառուցվող Արատեսի միջոցով ես զգացի, թե ինչպիսի կյանքով են զբաղվել այս լքված գյուղի նախնիները, ինչպիսի պայմաններում են ապրել այստեղ, ինչ այգիներ են ունեցել: Ուղղակի հիացած եմ, ու չեմ կարողանում մտքերս ու զգացումներս ամբողջությամբ զետեղել այստեղ:Ինչևէ, հասանք Արատես, մտանք մեր համար բնակատեղի հանդիսացող տունը: Տուն, որը արդեն չի տարբերվում սովորական գյուղում ապրողի տնից: Իհարկե չեմ կարող չնշել այն ահռելի աշխատանքը, որը տարել է Սմբատը՝ իր օգնական աշխատողների հետ: Վառարանի շուրջ նստեցինք և ջերմ զրույցի բռնվեցինք: Անկեղծ ասած ես շատերին չէի ճանաչում մեր ճամփորդական խմբի կազմից: Բայց այնքան ջերմություն կար բոլորի մեջ, որ ես ակամայից ինձ լիիրավ անդամ զգացի առաջին իսկ պահից: Տիար Բլեյանի ու տիար Գևորգի աջակցությունը այդ հարցում նույնպես շատ մեծ էր: Անձրևոտ և ցուրտ եղանակին չէր կարող ուղեկից չլինել թեյախմությունը: Տաք թեյը, ջերմ զրույցը հաջորդում էին միմյանց: Իհարկե դրանից հետո մենք ինչպես կարող էինք մոռանալ կարտոֆիլի պլեճի մասին: Մեր դասավանդողներից Մենուան պատրաստեց այն: Տիար Բլեյանի հետաքրքիր կատակները, Մենուայի պլեճները, հաճելի երաժշտությունը, մանկավարժական զրույցները, անձրևոտ և խորհրդանշական եղանակը ամբողջացնում են ամենը: Օրը ավարտեցինք հաճելի տպավորություններով: Հաջորդ օրը այնքան կարճ թվաց, չէ որ պետք է հետ վերադառնայինք Երևան, բայց մինչ այդ տիար Գևորգի գլխավորությամբ մի փոքր խմբով զբոսանք կազմակերպեցինք Արատես գյուղից վերև գտնվող տարածքներ: Տիար Գևորգը մանրամասն նկարագրեց շրջակայքը, թե ուր են տանում բոլոր արահետները, թե ինչ կարևոր նշանակություն ունի այդ ճանապարհը գյուղի , ինչպես նաև այլ գյուղերի համար: Դե իհարկե բնությունն էլ իր կատարելությամբ ամբողջացնում էր ամենը: Այսպիսով վերադարձանք Երևան: Կարճատև, բայց բովանդակալից ճանապարհորդություն գնահատելով վերջինիս:
Արշակ Մարտիրոսյան 