Կարգավորված հավաքածուների օրինակ է շախմատի տախտակի վանդակների անվանումը՝ a3, f8, d4: Ըստ պայմանավորվածության՝ առաջինն ասվում է տառը, որը համապատասխանում է սյունակի համարին, հետո թիվը, որը տողի համարն է։
Երեք տարբեր բանջարեղենի քանակը 3 թվերի բազմությամբ նկարագրել հնարավոր չէ։ Եթե ցանկանում ենք, որպեսզի {1, 3, 2} նկարագրի 1 կարտոֆիլ, 3 բազուկ և 2 գազար, ապա պետք է օգտագործենք ոչ թե բազմությունները, այլ կարգավորությունները՝ (1, 3, 2): Կարգավորության դեպքում թվարկման հերթականությունը կարևոր է։ Կարգավորված հավաքածու օգտագործելու համար պետք է ունենալ որևէ պայմանավորվածություն, թե ինչ է նկարագրում առաջին տարրը, ինչ՝ երկրորդ տարրը և այդպես շարունակ։ Կարգավորություններում տարրերը գրվում են բազմության պես, բայց { } փոխարեն օգտագործվում են ( ) փակագծերը: (1, 3, 2) և (2, 1, 3) կարգավորված եռյակներն իրարից տարբեր են։ Ի տարբերություն բազմության՝ կարգավորված հավաքածուներում թվերը կարող են կրկնվել։ Օրինակ՝ (1, 1, 1)՝ նշանակում է մեկական կարտոֆիլ, բազուկ և գազար։ ՍԱՀՄԱՆՈՒՄ Երկու թվերից բաղկացած կարգավորված հավաքածուներն անվանում են կարգավորված զույգեր։ Նկատենք, որ երկնիշ բնական թվերը նման են կարգավորված զույգերի. առաջին թվանշանը ցույց է տալիս տասնյակների քանակը, իսկ երկրորդը՝ միավորների։